11 വർഷത്തെ ഇടവേളക്ക് ശേഷം നടി രേവതി സംവിധാനം ചെയ്യുന്ന ചിത്രമാണ് ‘ദ ലാസ്റ്റ് ഹുറ’. കജോൾ ആണ് ഈ ഹിന്ദി ചിത്രത്തിൽ കേന്ദ്ര കഥാപാത്രത്തെ അവതരിപ്പിക്കുന്നത്.
"വേഗത്തിൽ സമ്മതം മൂളിപ്പിച്ച, ഹൃദയത്തില്‍ തൊടുന്ന ഒരു കഥയാണിത്" രേവതിയുമൊത്തുള്ള ചിത്രത്തിനൊപ്പം കജോള്‍ സോഷ്യൽ മീഡിയയിൽ കുറിച്ചു.
ഒരു യഥാർത്ഥ സംഭവത്തെ ആസ്‌പദമാക്കിയുള്ള ചിത്രത്തിന്റെ രചന നിർവഹിച്ചിരിക്കുന്നത് സമീര്‍ അറോറയാണ്. ജീവിതത്തിലെ വെല്ലുവിളികളെ പുഞ്ചിരിയോടെ നേരിടുന്ന 'സുജാത' എന്ന അമ്മയുടെ കഥയാണ് 'ദ ലാസ്റ്റ് ഹുറ' പറയുന്നത്. ബിലീവ് പ്രൊഡക്ഷന്‍സ്, ടേക്ക് 23 സ്റ്റുഡിയോസ് പ്രൊഡക്ഷന്‍ എന്നീ ബാനറുകളില്‍ സൂരജ് സിംഗ്, ശ്രദ്ധ അഗ്രവാള്‍ എന്നിവർ ചേർന്നാണ് ചിത്രം നിര്‍മിക്കുന്നത്.
2002ൽ രേവതി ആദ്യമായി സംവിധാനം ചെയ്ത 'മിത്ര്, മൈ ഫ്രണ്ട് ' എന്ന ചിത്രത്തിന് ദേശീയ പുരസ്കാരം ലഭിച്ചിരുന്നു. രണ്ട് ഫീച്ചർ സിനിമകളും ആന്തോളജികളുടെ ഭാഗമായി രണ്ട് ഹ്രസ്വചിത്രങ്ങളും രേവതി സംവിധാനം ചെയ്തിട്ടുണ്ട്.
Commentaires