Netflixലൂടെ മണിരത്നം അവതരിപ്പിക്കുന്ന തമിഴ് ആന്തോളജി സിനിമയാണ് നവരസ. ഓഗസ്റ്റ് 6 ന് ചിത്രം റിലീസ് ചെയ്യുമെന്നറിയിച്ചുള്ള പ്രൊമോ മ്യൂസിക് വീഡിയോ Netflix യൂട്യൂബിൽ റിലീസ് ചെയ്തു.
പ്രിയദർശൻ, ബിജോയ് നമ്പ്യാർ, ഗൗതം മേനോൻ, അരവിന്ദ് സാമി, കാർത്തിക് നരേൻ, കാർത്തിക് സുബ്ബരാജ്, രവീന്ദ്രൻ പ്രസാദ്, സർജുൻ, വസന്ത് സായി എന്നിവർ സംവിധാനം ചെയ്ത ഒൻപത് സിനിമകളാണ് 'നവരസ'യിൽ. മണിരത്നവും സംവിധായകൻ ജയേന്ദ്ര പഞ്ചപകേശനും ചേർന്നാണ് നിർമ്മാണം. കോവിഡ് ദുരിത കാലത്ത് ജീവിതം വഴിമുട്ടിയ തമിഴ് സിനിമ വ്യവസായത്തിന്റെ ഭാഗമായ ദിവസക്കൂലിക്കാരെ സഹായിക്കാനാണ് 'നവരസ' നിർമ്മിച്ചതെന്ന് മണിരത്നം പറഞ്ഞിരുന്നു.
സൂര്യ, വിജയ് സേതുപതി, പ്രകാശ് രാജ്, പാർവ്വതി, അരവിന്ദ് സാമി, രേവതി, സിദ്ധാർത്ഥ്, രോഹിണി, പ്രയാഗ മാർട്ടിൻ എന്നിങ്ങനെ നിരവധി അഭിനേതാക്കൾ ഈ ഒൻപത് സിനിമകളിലായി ഉണ്ട്. ഇവരെ ഉൾപ്പെടുത്തി ഭരത്ബാലയാണ് പ്രൊമോ മ്യൂസിക് വീഡിയോ സംവിധാനം ചെയ്തത്. എ ആർ റഹ്മാന്റെ സംഗീതത്തിൽ തയ്യാറാക്കിയ വീഡിയോയുടെ ഛായാഗ്രഹണം നിർവ്വഹിച്ചത് മലയാളിയായ സുദീപ് ഇളമണും വിജയ് കാർത്തിക് കണ്ണനും ചേർന്നാണ്. തിരുവനന്തപുരം സ്വദേശി ക്രിസ്റ്റി സെബാസ്റ്റ്യനാണ് എഡിറ്റർ.
Comentarios